1 عيال الله

صفصاف

تراب السكة يا معفر
شجر صفصافك الأصفر
بقيت بخلان بتستكر عليا أعيش
تشيل الحلم ما تخليش
كده ينفع ؟
ماعادش مكانك الواسع يساع القلب من حلمه
حلم حلمين
فمات التاني فوق حجري
وراح الأول المجنون على صدري سحابة طيش
و بتغمي دموع عيني فما تنزل
وانا بتذل
زفير القهر متزلزل
علي حسك
ولو حسك نواح الناي يزيد الحزن فوق حزني

وجع

تراب السكة يا تراب الوجع إرحم
متين أمشير يعدوا في السنة الواحدة على قلبين
متين طوبة على نفس الوجع تخبط
وبتهيج زفيرك ريح ما بتخليش على وش الحياة نسمة
وبتعمي عنينا في وقت نتمنى نموت وانتَ على الرجلين
ما طول عمرك على جلدي
و عايش لم خلص جَلَدِي
ومستعذب نواح جَلْدي
ومستكتر عليا أعيش كما عابر سبيل ضلمة

عيال الله

تراب السكة يا مصاحب تراب القبر ومصاحب عيال الله
أنا عارف بإنك لسه بتخاصم جزم ماركتها م الغالي فما تطولها
عجيب أمرك
بتتلفلف على كل السطور تكتب آهات تنطقها وتمثل بفن وصنعة تقنعني
أتاري الكدب ده معشش ما بين عفرة رياح امشير ولسعة زمهرير طوبة
ده لسه الواد بيتمشى عليك عايز تدله عالسبيل تاني
برئ جدا
ما يعرفشي بإنك لو تقول تاني فهاتوِّه ف إحلامه
وتخدع عينه قدامه
وتخرج لابس الطراطير
وتلبس وش مش وشك
برغم ان العيدين عدوا
وغيرهم في السراب بعدوا
لكنك لسه بتزمر
وبتحاول تخبي الدقن م الشيبة
وم العيبة إذا تستل سكينك
وتقطع حبلها السري عشان تبعدها وتعيش الشباب تاني

أحمال

تراب السكة يا حمل الضهور خفف حمولك يوم
وارفع إيدك العفرة عن العين اللي ما بتدوق حلاوة النوم
كابوس حملك
وحلمي خاف لا يظهر بين شفايف حزن أيامك
أكيد عارف بإنك راح تمصمصها وتتحسر على عمري
منين تحزن على وجعي وإنت الحزن في قلب الولد منك
أهين منك

شراع مكسور

تراب السكة يا مكسر شراعي فوق صخور بتسنها أعوام
أنا لسه الكلام فيا وليد اللحظة واللحظة ما بتكفيش
وصوتي اللي صبح بكاي ينوح نوح الحريم لو ماتلها راجل
بيصرخ فيك وبيقولك تسيبني أعيش
ولا تخلصشي حدوتة ما بيني وبين طريق نفسي أخطي له
ولا تأمرش قلبي في يوم إذا عدى ف مهب الريح يوطيله
أنا عمري ما وطيت له
وحتى عيونه لو طق الشرار فيها ما اغنيله
ولا انامله كسير محروم بيشكيله
ولو بيسابق الجري اللي انا جريته تعب في مرار ما اهديله
ولا عمري بقيت له ف يوم كما ديله
أوطي لمين ؟
لواحد برضه بيوطي ؟

رصيف

تراب السكة يا تراب اللي مات بإديك
كلامي لسه ما قلته
برغم ان الرصيف سميع
ولا هانطق
طب ان يرضيك أقوله واطق هاتكلم
ده لسه الشارع امبارح حضن مني كلامي لما سرسبته على أرضه
وانا ماشي وحيد سكران بحلم حلمته يوم ونسيت
لقيت برضه شريد سكران
يبص البصة من جهله بحاله وفز يتريق على مشيي
وفوق نفس الرصيف رامي حموله بس بيتوه عشان ينسى
حاولت كتبر اكون زيه لكني فشلت
عصرت السُكْر صبيته في كاس سكران
شربته ولسه ما نسيتشي
طب انسى ازاي

ورق

تراب السكة يا فارد إديك للناس
أنا فارد كلامي بحور
ولسه بَـبـَيـَّض الإحساس على الورقة
ولسه بَدُور
و أوزاني ما فيها كسور
لكن مكسور
وبترجاك
تسيبني هناك مابين دمعي وبين بسمة مفرقاني
ولا تندهلي من تاني
وسيب كل الورق مفتوح
عشان هاشكيلك الأيام

اقرأها كاملة

0 مقهىً لأمير الشعراء / محمود درويش

قصيدة مقهىً _ لأمير الشعراء محمود درويش

مقهى، وأنت مع الجريدة جالس
لا، لست وحدك. نصف كأسك فارغ
والشمس تملأ نصفها الثاني ...

ومن خلف الزجاج تري المشاة المسرعين
ولا تُرى [إحدي صفات الغيب تلك:
ترى ولكن لا تُرى]
كم أنت حر أيها المنسي في المقهى!
فلا أحدٌ يرى أثر الكمنجة فيك،
لا أحدٌ يحملقُ في حضورك أو غيابك،
أو يدقق في ضبابك إن نظرت
إلى فتاة وانكسرت أمامها..
كم أنت حر في إدارة شأنك الشخصي
في هذا الزحام بلا رقيب منك أو
من قارئ!
فاصنع بنفسك ما تشاء، إخلع
قميصك أو حذاءك إن أردت، فأنت
منسي وحر في خيالك، ليس لاسمك
أو لوجهك ههنا عمل ضروريٌ. تكون
كما تكون ... فلا صديق ولا عدو
يراقب هنا ذكرياتك /
فالتمس عذرا لمن تركتك في المقهى
لأنك لم تلاحظ قَصَّة الشَّعر الجديدة
والفراشات التي رقصت علي غمازتيها /
والتمس عذراً لمن طلب اغتيالك،
ذات يوم، لا لشيء... بل لأنك لم
تمت يوم ارتطمت بنجمة.. وكتبت
أولى الأغنيات بحبرها...
مقهى، وأنت مع الجريدة جالسٌ
في الركن منسيّا، فلا أحد يهين
مزاجك الصافي،
ولا أحدٌ يفكر باغتيالك
كم انت منسيٌّ وحُرٌّ في خيالك!

اقرأها كاملة

0 صبي لي الشاي _ من يومياتي

صبي لي الشاي
على همي وهمك يمكن نشرب كباية
كبايتك سودة بلون التفل و لون همي
والهم بيتعبى أزايز
وانا شارب م الهم إزازتين
عالريق صباحي وبتنهد حلمي ف أنفاس
ولا يحلالي التنهيد إلا مع صحبة نوح
كبايتك مالها بتتعكر
مش برضه السكر حلاها
ولا السكر بقى بالغالي
خايف لا الشاي برضك يغلى
تبقى دي نكته
بيغلوا المر وبيغلوا أهة كبدي
دا انا كبدي النار بتقطع فيه
أنا كبدي بيتحسر لما اتذكر
ازاي كنا بنستنى العصرية
علشان نشرب كباية شايك في البلكونة
ونتفرج على غية واد غاوي يطير أحلامه حمام
وازاي كانت حواديتك سكر بيحلى الشاي .....
ويحلى ايامي
دا انا فاكر شاي التموين
و مكعب سكر كنت استغرب من شكله
و اللهفة ف وقت بنتسامر جواه على شاي تاني
ونتوه ...
جوه الحواديت...
و الكدب ساعات يلزم قعدتنا عشان نضحك
مش برضه الشيخ قال لي وقال لك النكته حرام
وانا صدقته
وبقينا نخاف م النكتة
نقولها ف سر ونضحك كاتمين الضحكة
ياه على أيام ما بترجعشي
صبيلي الشاي يلا افتكري
أيام الكاس لما كسبنا
وانا سايب ماتش القمة و قاعد في البلكونة بعاكس بنت الجار
والجار سرحان في الماتش ماهوش داري باللي بيحصل
كان أخر حاجة انا باوصل ليها التسبيلة
وبسمة من الممكن
وخجل على خدي السخن يبان أكتر ما يبان منها
ياه على أيام ما بترحمشي
بنزيح المر ومش عاجب
ورغيف العيش يرفع حاجب
وينزل حاجب
يتأمر
على حالي وحالك يتأمر
مش فوق النار
ولا كان يتنطط على جوفي بعدِما اسجر من علبة ابويا
ومن جهلي
ماعرفتش انه ف وقت امَّاْ انا ببعد عنه
بيعد سجايره
ويتخانق وياكي عليا
ويقول تلفان
والبت ام الصدر المرمر
لما بتهرب من عين ما بترحمش دموعها
تطلعلي تسجر ويايا
قال إيه اصحاب
والحد اللي ما بيني وبينها كنت احترمه
وبرغم الولعة ف جتتنا كنا نداري
عاملين اخوات
بنمثل صح
بس الدخانة ما تحلاشي من غير الشاي
كنت اتمنى وجودك ويايا
وبتمنى ماتجيش من مشوارك بدري
واتمنى أقرب وأبوسها
لكن خواف
كانت تتمنى اطلب منها
فاهمين بعضينا
بنستعبط
يمكن
لكن أحسن
ده كفاية عليا اما بشوفها بتذكر بسمتها الطاهرة من غير تشويش
ولا أفكار سودة تخليني خاين بالفكر وبالأحلام
حمد الله على سلامة قلبي
لساني بحب ومش خاين
حمداً لله
لله
بشحت كباية شاي
لله يا اصحاب دا انا من تعبي
بتمنى الرضا ليكم ترضوا
بتمنى اللحظة اللي أشوفكم فيها وابكي
نفسي أفضفض
لكن بيقولوا الشعر الصح لازم له شوية تأييف
ولا عادت فضفتي بتنفع تتقال في قصيدة من المستعجل والتيك اواي
طب أعمل إيه
ما انا تقليدي من عصر الطربوش والمزة
أعتب على مين في اللي اتقالي
أنا عايش سن الستين شايب وعجوز
والسن شباب آي والله
أنا ما اتعودتش إني ألومك على بدرك بذر الطيبة فـ تراب روحي

ده كفاية الوجع اللي اتمكن منك
وبرغم انه مهلك جواكي البسمة الشفافة
لسه الحدوتة ما خلصتشي ولا يخلصشي
براد الشاي
كباية شايك في السهرة زي ما هي

اقرأها كاملة